Daniel 7 — EAB — Biblija.net

← Prejšnje Daniel 7 Naslednje →

1 2 3 4 5 6 7 8 9 10 11 12

Danielen lehen ikuskaria: lau piztitzarrak

¹ Babiloniako errege Belxatzarren* 7,1 Belxatzar: Ik. 5,1 oh.erregealdiko lehen urtean, ametsa eta ikuskariak izan zituen Danielek ohean zegoela. Gero, idatzi egin zuen ametsa. ² Hona Danielen kontakizuna: «Ikuskari bat* 7,2 Ikuskari bat: Ikuskaria Nabukodonosorren ametsaren parekoa da, lau piztitzarrek giza erreinuen jarraipena adierazten dutelarik (ik. 2,40 oh.).izan nuen gauez: Ortziko lau ertzetatik haize indartsu batek itsaso handia harrotzen zuen. ³ Eta lau piztitzar, laurak ezberdinak, atera ziren itsasotik. ⁴ Lehenengoak lehoia zirudien, baina arranoaren hegalak zituen; hari begira nengoela, kendu egin zizkioten hegoak eta, lurretik altxaraziz, bi hanken gainean jarrarazi zuten, gizakia bezala, eta giza adimena eman zioten. ⁵ Bigarren piztiak hartza zirudien: erdi jaikita zegoen eta ahoan, hortz artean, hiru saihets-hezur zituen. Honela esan zioten: “Jaiki eta jan haragia ugari!” ⁶ Gero, begira nengoela, beste piztia bat ikusi nuen, lehoinabarraren antzekoa: bizkarraldean lau hego zituen eta lau buru, eta boterea eman zioten. ⁷ Nire gau-ikuskarietan laugarren piztia bat ikusi nuen: beldurgarria zen, izugarria eta guztiz indartsua; burdinazko hagin handiak zituen; dena irensten eta txikitzen zuen, jan gabe uzten zuena hankapean apurtzen zuelarik. Beste piztiak ez bezalakoa zen; hamar adar* 7,7 laugarren piztia: Greziar inperioa, Alexandro Handiak sortua. // hamar adar: Alexandroren ondorengo diren Siriako erregeak, seleukotarrak (ik. 7,24). Adarra, Biblian, indarraren eta boterearen sinbolo da sarritan.zituen. ⁸ «Adarrei begira nengoela, adar txikiago bat* 7,8 adar txikiago bat: Adar honek Antioko Epifanes (K.a. 175etik 164ra) adieraz lezake, juduak gogor pertsegitu zituena, berauen legea eta kultua debekatuz eta kultu paganoak Jerusalemen ezarriz (ik. 7,24-25).atera zitzaion beste adarren artean, eta hauetako hiru erauzi zizkion. Adar berri hark gizakiarenak bezalako begiak eta harrokeriaz hitz egiten zuen ahoa zituen.

Jainkoaren epaia

⁹ «Begira nengoela, hona hemen zer ikusi nuen: Errege-aulki batzuk jarri zituzten eta gizon zahar bat* 7,9 gizon zahar bat: Jainkoaren beraren sinbolo da.jesarri zen.
«Haren jantzia elurra bezain zuri,
buruko ileak artilea bezain garbi!
Haren aulkia eta gurpilak
sugar kiskalgarri!
¹⁰ Suzko ibai bat
ateratzen zen haren aurretik.
Jendetza izugarria* 7,10 Jendetza izugarria: Zerutar izaki guztiak, aingeruak, ditu Jainkoak zerbitzari.zuen zerbitzari,
milaka eta milaka zeuden
haren aurrean zutik.
Auzia hasi
eta zabaldu ziren liburuak. ¹¹ «Oraindik begira nengoen, adar txiki hark esaten zituen hitz harroengatik harriturik. Honetan, akabatu egin zuten laugarren piztitzarra; haren gorpua txikitu eta sutara bota zuten. ¹² Beste piztiei agintea kendu zieten, baina bizirik utzi zituzten aldi baterako. ¹³ «Nire gau-ikuskarietan, gizaseme antzeko bat* 7,13 gizaseme antzeko bat: Arameerazko esakuneak gizabanakoa adierazten du. Baina Danielen ikuskarian badu zentzu kolektiboa ere, Jainkoaren herri santuaren buru eta ordezkari delarik (ik. 7,18.22). Pertsonaiak eragin handia izango du mesianismo-mailan eta bera da Jesusek bere buruari ematen dion Gizonaren seme tituluaren jatorria (ik. Bibli Hiztegia).ikusi nuen zeruetako hodeietan etortzen. Gizon zaharrarengana hurbildu zenean, honi aurkeztu zioten. ¹⁴ Agintea, aintza eta erregetza eman zizkioten: herri, nazio eta hizkuntza guztietako jendeak zerbitzatzen zuen.
«Haren aginteak beti iraungo du,
ez du azkenik izango,
haren erregetza
ez da inoiz hondatuko.

Lehenengo ikuskariaren azalpena

¹⁵ «Ikara larrian nengoen ni, Daniel, neure barruan, ikusten ari nintzen guztiengatik* 7,15 Tx.eko testua iluna da.. ¹⁶ Zutik zeuden haietako batengana hurbildu eta ikusi nuen guztiaren egiazko esanahia azaltzeko eskatu nion. Guztiaren argitasuna eman zidan hark: ¹⁷ Lau piztitzar horiek munduan sortuko diren lau erreinu dira. ¹⁸ Baina horien ondoren, Goi-goikoaren herri santuari* 7,18 Goi-goikoaren herri santuari: H.h., Goi-goikoaren santuei. Askotan, santu hitzak aingeruak adierazten ditu; hemen, ordea, Jainkoaren herriari buruz esana dago.emango zaio erreinua, eta harena izango da betiko. ¹⁹ «Gero, laugarren piztitzar hura zer izan zitekeen jakin nahi nuen, hain baitzen besteak ez bezalakoa: guztiz ikaragarria zen, burdinazko haginak eta brontzezko atzaparrak zituena; dena irensten eta txikitzen zuen, jan gabe uzten zuena hankapean apurtzen zuelarik. ²⁰ Jakin nahi nuen orobat zer esan nahi ote zuten haren buruko hamar adarrek, baita besteen artean atera eta hauetariko hiru erauzi zizkion adar txikiak ere; baita zergatik zituen adar txikiak begiak eta harrokeriazko hitzak zerizkion ahoa, eta zergatik agertzen zen besteak baino handiago. ²¹ «Begira nengoela, adar hura Jainkoaren herri santuaren kontra borrokan ari zen eta ia menderaturik zeukan; ²² baina etorri zen gizon zaharra eta goi-goiko Jainkoaren herri santuaren alde atera zen* 7,22 alde atera zen: Hau da, aldeko epaia eman zuen. Honela ere itzul daiteke: epaitzeko ahalmena eman zion (herri santuari) (ik. Ap 20,4)., heldua baitzen herri santua erreinuaren jabe egiteko garaia. ²³ «Ondoren, honela hitz egin zidan: Laugarren piztia lur gainean izango den laugarren erreinua da, beste hirurak ez bezalakoa. Mundu osoa irentsiko du, hanka azpian hartuko eta txikituko. ²⁴ Hamar adarrak, erreinu honetan izango diren hamar errege dira. Ondoren, beste bat etorriko da, aurrekoak ez bezalakoa, haietako hiru errege menderatu eta gero. ²⁵ Goi-goikoaren aurka biraoka arituko da eta herri santua gaizki erabiliko du: jaiak eta legea aldatu nahi izango ditu. Hiru urte eta erdiz* 7,25 Hiru urte eta erdiz: H.h., Denboraldi batez, bi denboraldiz eta denboraldi erdiz. Epe bera azaltzen da 9,27 eta 12,7 tx.etan. Antiokoren erasoaldiak iraun zuen tartea da gutxi gorabehera (K.a. 168tik 165era); baina kopuruak, sinbolo gisa, erasoaldiak epe mugatua izango duela adierazten du.egongo da herri santua haren menpean. ²⁶ Baina etorriko zaio auzi-garaia, eta kendu egingo diote agintea, eta erabat hondatua eta ezereztua utziko dute. ²⁷ «Orduan, Goi-goikoaren herri santuari emango zaizkio zerupean dauden erreinu guztietako erregetza, agintea eta handitasuna. Beti iraungo du herri horren erregetzak, eta munduko botere guztiek obedituko diote eta zerbitzatuko. ²⁸ «Hemen amaitzen da kontaera. Ni, Daniel, neure burutazioak zirela eta, oso beldurturik gelditu nintzen, aurpegia zurbil; baina hauek guztiak barruan gorde nituen.

← Prejšnje Naslednje →