2 Makabearrak 11 — EAB

← Précédent 2 Makabearrak 11 Suivant →

1 2 3 4 5 6 7 8 9 10 11 12 13 14 15

Judasek Lisias menderatu

(1 M 4,26-35)

¹ Antioko IV.a erregearen hezitzaile eta ahaide zen Lisias gobernuburua oso haserre zegoen gertatuagatik. Handik pixka batera, ² laurogei mila gizon eta bere zalditeria osoa bildurik, juduen kontra abiatu zen. Jerusalem greziarren bizileku bihurtu nahi zuen, ³ jentilen beste jauretxeei bezala tenpluari ere zergak ezarri eta urtero apaiz nagusi kargua salgai jarri. ⁴ Lisiasek ez zuen kontuan, inola ere, Jainkoaren ahalmena. Harrotua zegoen hainbeste milaka gudari eta zaldun eta laurogei elefante zituelako. ⁵ Judean sarturik, Jerusalemdik hogeita hamar kilometrora dagoen Bet-Sur hiri gotor sendora hurbildu eta inguratu egin zuen. ⁶ Makabearraren aldekoek, Lisias gotorleku hura inguratzen ari zela jakitean, jende guztiarekin batera, hasperen eta negar artean, otoitz egin zioten Jaunari, Israel salbatzera aingeru ona bidal zezan. ⁷ Makabearrak, armak hartzen lehena bera izanik, adoretu egin zituen besteak, beren senideei laguntzearren arriskuari aurre egin ziezaioten. Eta denak batera ausarki oldartu ziren. ⁸ Han bertan, Jerusalemdik hurbil, zuriz jantziriko zaldun bat agertu zitzaien aurrean, eskuan urrezko armak zituela. ⁹ Orduan, denek aho batez Jainko errukitsua goretsi zuten. Erabat adoretuak eta kemenez beteak, prest zeuden gizonei ez ezik, basabererik amorratuenei eta burdinazko harresiei ere erasotzeko. ¹⁰ Guda-lerrotan jarririk, aurrera zihoazen, zerutiko laguna gidari zutela. Izan ere, errukitu egin zitzaien Jauna. ¹¹ Lehoiak bailiran erori ziren etsaien gainera. Hamaika mila gudari oinezko eta mila eta seiehun zaldizko hil zituzten eta, gainera, guztiei ihes eragin. ¹² Gehienak zaurituak eta armak galdurik joan ziren ihesi; Lisias bera ere lotsagarri ihes eginez salbatu zen.

Bakeak egin juduekin

(1 M 6,55-61)

¹³ Lisias, ordea, ez zen zentzugabea. Jasan zuen hondamendia hausnartuz, hebrearrak menderagaitz zirela ohartu zen, Jainko ahaltsua lagun zutelako. ¹⁴ Orduan, mandatariak bidali zizkien juduei bakeak egiteko, baldintza bidezkoak ipiniz. Erregea ere beraiekin adiskidetzera bultzatuko zuela hitzeman zien. ¹⁵ Denen onari begira, baiezkoa eman zien Makabearrak Lisiasen proposamen guztiei. Erregeak ere, bere aldetik, Makabearrak juduentzat Lisiasi idatziz eskatutako guztia eman zion. ¹⁶ Lisiasek juduei idatzi zien gutunak hau zioen: «Lisiasek judu-herriari, agur! ¹⁷ Joan eta Absalom* 11,17 Joan eta Absalom: Joan zuen izena Judas Makabearraren anaietako batek (ik. 1 M 2,2), baina ez dakigu hemen aipatua bera den. Absalom pertsonaia handia zen; buruzagi zituen bi seme (ik. 1 M 11,70; 13,11).zuen mandatariak eman didate azpian idatzitako gutuna, eta berorretan datozen proposamenak onartzeko eskatu. ¹⁸ Eman diot erregeari adierazi behar zitzaion guztiaren berri; nire esku zegoenari, berriz, baiezkoa eman diot. ¹⁹ Beraz, zuek gobernuarekiko borondate onean irauten baduzue, ni ahaleginduko naiz zuen alde lan egiten. ²⁰ Arazo hauei eta xehetasunei buruz zuekin hizketa daitezela agindu diet zuen eta neure mandatariei. ²¹ Izan ongi! Ehun eta berrogeita zortzigarren urtean, Dioskoro hilaren hogeita lauan* 11,21 148. urtean: K.a. 164a. // Dioskoro: Kretako egutegiko hil baten izena; seleukotar egutegian Xantiko (ik. 11,30) deitua, eta hebrear egutegian Adar (otsailaren 26 eta martxoaren 27 artekoa).».

Erregeak Lisiasi idatzitako gutuna

²² Erregearen gutunak hau zioen: «Antioko erregeak Lisias anaiari, agur! ²³ Gure aita joana da jainkoengana* 11,23 Gure aita: Antioko Epifanes. // joana da jainkoengana: Seleukotarrak horrela mintzatu ohi ziren heriotzaz; hildako erregeei kultu eman ohi zieten.. Eta nik, nire erreinuko jendeak bere lanetan ezeren beldurrik gabe jardun dezan nahi dut. ²⁴ Jakin dut, juduek ez dituztela onartu nahi greziar ohiturak, gure aitak nahi zuen bezala. Nahiago dutela beren biziera, eta beren legeak betetzen uzteko eskatzen dutela. ²⁵ Herri hori ere beldurrik gabe bizi dadin nahi dut nik. Beraz, hau erabakitzen dut: Itzul diezaietela berriro tenplua, eta bizi ahal izan daitezela beren arbasoen ohituren arabera. ²⁶ Bidal iezazkiezu, mesedez, mandatariak beraiekin bakeak egitera eta nire erabakia jakinaraztera, horrela, konfiantzaz bizi eta beren lanei gogoz ekin diezaieten».

Erregeak judu-herriari idatzitako gutuna

²⁷ Erregeak judu-herriari igorritako gutunak hau zioen: «Antioko erregeak juduen legebiltzarkideei eta judu-herri osoari, agur! ²⁸ Zuek ongi izatea nahi nuke; ni ere ongi nabil osasunez. ²⁹ Menelaok aditzera eman dit, zeuen etxe eta lanetara itzuli nahi duzuela. ³⁰ Xantiko hilaren hogeita hamarra baino lehen itzultzen direnak, bakean eta seguru bizi ahal izango dira. ³¹ Juduok zeuen janariak hartu eta legeak bete ahal izanen dituzue, antzina bezala. Zuetariko inori ez zaio nekerik emango ezjakinean eginiko okerrengatik. ³² Menelao bidaltzen dizuet, zuek lasaitzeko. ³³ Izan ongi! Ehun eta berrogeita zortzigarren urteko Xantiko hilaren hamabostean* 11,33 148. urteko… 15ean: K.a. 164. urteko apirilean.».

Erromatarrek juduei bidalitako gutuna

³⁴ Erromatarrek ere gutuna idatzi zieten juduei: «Kinto Memiok eta Tito Maniok, erromatarren mandatariok, judu-herriari, agur! ³⁵ Ontzat hartzen dugu Lisiasek, erregearen anaiak, eman dizuena. ³⁶ Baina erregeari aurkeztekoa dela Lisiasek erabaki duena, aztertu zeuek ere eta bidal iezaguzue erantzuna lehenbailehen mandatariren batekin, zuentzat egokiena zer den erregeari guk adierazteko. Izan ere, Antiokiara goaz* 11,36 Antiokiara goaz: Hau izango zen juduen eta erromatarren arteko lehen harremana. Erromatarrak, K.a. 168an Pidnan garaipena erdietsi ondoren, Ekialde osoan indarra hartzen ari ziren.. ³⁷ Beraz, bidal iezazkiguzue batzuen batzuk bizkor, guk ere jakin dezagun zuen iritzien berri. ³⁸ Izan ongi! Ehun eta berrogeita zortzigarren urteko Xantiko hilaren hamabostean».

← Précédent Suivant →